Fyrir stuttu kom í ljós hvaða skóli bar sigur úr býtum í keppni MORFÍs 2009-2010. Lið Menntaskólans við Sund mælti með staðhæfingunni „fáfræði er sæla“ en Verzlunarskóli Íslands gegn. Að leikslokum stóðu MSingar uppi sem sigurvegarar og stuðningsmaður liðsins, Atli Hjaltested, hlaut titilinn Ræðumaður Íslands 2010. Í sigurlaun hlýtur liðið, auk bikara, blómvanda og medalía, 200 þúsund króna gjafabréf fyrir utanlandsferð.

Í fyrsta sinn í sögu MORFÍs var nú reynt að hafa fimm dómara og kunnum við Bjarka Vigfússyni, Brynjari Guðnasyni, Jóni Benidiktssyni, Lárusi Jóni Björnssyni og Fannari Frey Ívarssyni, oddadómara, bestu þakkir fyrir þeirra starf. Aukinn fjöldi dómara gerir þá staðreynd enn merkilegri að einungis fimm stig skildu liðin að.

Öllum sem lögðu hönd á plóg til að úrslitin gætu orðið eins glæsileg og raunin var þökkum við kærlega fyrir; Ásgeir Erlendsson, fundarstjóri, dómarar, Háskólabíó, RÚV, 12 Rauðar Rósir og útvarpsspekúlantarnir okkar, Dóri DNA og Stefán Rafn Sigurbjörnsson.

Þess má geta að keppninni var í fyrsta sinn eftir allt of langt hlé komið fyrir vit almennings en henni var útvarpað beint á Rás 2. Áhugasamir geta nálgast upptöku af keppninni á síðu RÚV.

Keppendum, þjálfurum, dómurum, starfsmönnum og áhorfendum öllum þakka ég kærlega samfylgdina á liðnu starfsári.

Nú fer allt að skýrast varðandi úrslitin og vantanlega eru margir orðnir ansi óþreyjufullir. Umræðuefni keppninnar er „Fáfræði er sæla“ og mælir lið Menntaskólans við Sund með. Fundarstjóri að þessu sinni er reynsluboltinn Ásgeir Erlendsson.

Við minnum á að allir sem hlotið hafa titilinn ræðumaður kvöldsins eiga inni miða á keppnina og mælst er til að sem flestir þeirra sjái sér fært að mæta, enda verður verðlaunum til þeirra dreift þá. Þeir þurfa ekki að ná í sína miða heldur gefa þeir sig fram við inngang þar sem einhver verður á ferðinni með lista.

Að lokum er bent á að ölvun ógildir miðann og að öll meðferð vímuefna er bönnuð á svæðinu. Að gefnu tilefni er einnig bent á að opinn eldur er stranglega bannaður í hvaða birtingarformi sem er.

Við óskum keppnisliðum góðs gengis og áhorfendum frábærrar skemmtunar.

Nú er orðið ljóst að í úrslitum MORFÍs 2010 mætast lið Verzlunarskóla Íslands og lið Menntaskólans við Sund. Síðastliðinn miðvikudag sigruðu Verslingar lið FG en föstudagskvöldið biðu Kvennskælingar lægri hlut gegn MS-ingum. Ekki er enn búið að ákveða dagsetningu fyrir úrslitin, en verður það að öllum líkindum gert á stjórnarfundi á morgun, mánudag.

Stefnt er að því að halda úrslitin, sem fyrri ár, í stóra sal Háskólabíós og ættu þessir skólar að fara létt með að fylla salinn. Þegar hefur verið tryggt að keppninni verður útvarpað beint á Rás 2, og ættu margir morfís-nördarnir að gleðjast við þessar fréttir, því undanfarin ár hefur verið nánast ógerlegt fyrir aðra en viðstadda að sjá úrslitakeppnina.

Stjórn MORFÍs vinnur nú í því að koma upp góðum gagnagrunni eldri keppna og hvetjum við eindregið alla sem eiga í sínum fórum upptökur af keppnum í ár eða eldri keppnum að hafa samband við meðstjórnendur stjórnarinnar. Númer þeirra og netföng má nálgast hér á síðunni.

Við viljum þakka keppendum, stjórnendum, þjálfurum og dómurum kærlega fyrir ánægjulegt og afkastamikið samstarf í vetur. Það duldist fáum að í ár tók stjórn upp á töluvert breyttum áherslum varðandi reglur og viðrulög við brotum á þeim, og er það mikið ánægjuefni hve vel tókst að aðlagast þeim. Að lokum þökkum við öllum þeim áhorfendum sem mættu á keppnirnar og sköpuðu á þeim þá frábæru stemningu sem einkennir MORFÍsheiminn.

Við óskum keppnisliðum velfarnaðar í úrslitum.

Fyrir skömmu lauk viðureign Verslinga og MR-inga í Bláa sal Verzlunarskólans og lauk þar með 3. umferð MORFÍs 2010. Skemmst er frá því að segja að lið Verzlunarskólans bar nauman sigur úr bítum í geysijafnri og skemmtilegri keppni. Munur á liðum var einungis sjö stig, en ræðumaður kvöldsins var stuðningsmaður MR-inga, Jóhann Páll Jóhannsson. Þar með er Versló kominn í undanúrslit, ásamt FG og Kvennó sem unnu sínar keppnir í gær, annarsvegar gegn MH og hinsvegar gegn FB.

Dregið var í dómarahléi fyrir stundu og drógust saman lið Kvennó og MS, en Versló mætir FG. Ljóst er að undanúrslitin verða gríðarlega spennandi, enda fjögur sterk lið sem etja þar kappi. Tímarammi umferðarinnar opnar eftir átta daga í samræmi við lög, föstudaginn 5. mars, en stendur til 26. mars.

Stjórn morfís hvetur liðin til að koma sér sem fyrst upp hentugri dagsetningu og koma skilaboðum skjótt til stjórnar.